Banka Qendrore Evropiane (BQE) ka prezantuar 10 dizajnet finaliste për kartëmonedhat e reja euro, të cilat pritet të hyjnë në qarkullim duke filluar nga fundi i vitit 2026. Për herë të parë, qytetarët e Bashkimit Evropian janë ftuar të japin mendimin e tyre dhe të zgjedhin se si do të duket euroja në vitet e ardhshme.
BQE ka përzgjedhur dy tema kryesore. E para i kushtohet figurave më të rëndësishme të kulturës evropiane, ndërsa e dyta vë në qendër natyrën, me lumenj, zogj dhe biodiversitetin e kontinentit.
Në variantin kulturor, kartëmonedhat do të shfaqnin personalitete të njohura si:
- 5 euro – sopranoja Maria Callas;
- 10 euro – kompozitori Ludwig van Beethoven;
- 20 euro – fituesja e Çmimit Nobel Marie Curie;
- 50 euro – shkrimtari Miguel de Cervantes;
- 100 euro – Leonardo da Vinci;
- 200 euro – shkrimtarja dhe fituesja e Nobelit për Paqe Bertha von Suttner.
Alternativa e dytë fokusohet te pasuria natyrore e Evropës. Çdo kartëmonedhë paraqet një specie të ndryshme shpendësh të lidhur me ekosistemet lumore, ndërsa në anën tjetër shfaqen institucionet kryesore të Bashkimit Evropian, si Parlamenti Evropian, Komisioni Evropian, Banka Qendrore Evropiane dhe Gjykata e Drejtësisë.
Lexo edhe: Kompanitë e AI-së po blejnë libra të vjetër për të trajnuar modelet e tyre, dhe më pas i shkatërrojnë
Presidentja e BQE-së, Christine Lagarde, ka theksuar se përfshirja e qytetarëve në këtë proces është një mënyrë për ta bërë euron më përfaqësuese të identitetit evropian. Pas konsultimit publik dhe përzgjedhjes së dizajnit fitues, kartëmonedhat e reja do të prodhohen dhe do të zëvendësojnë gradualisht serinë aktuale në vitet në vijim.
