Shqetësimi për zhvillimin e Inteligjencës Artificiale po përhapet në vendet perëndimore, ndërsa një sondazh i ri tregon mbështetje të konsiderueshme për pezullimin ose ngadalësimin e zhvillimit të mëtejshëm të teknologjisë.
Sipas sondazhit të kryer nga firma e pavarur Public First, në SHBA, Kanada dhe disa vende evropiane, një pjesë e madhe e të rriturve besojnë se inteligjenca artificiale paraqet rreziqe serioze, përfshirë mundësinë që teknologjia të ketë pasoja të rënda për njerëzimin.
Në gjashtë vendet e përfshira në sondazh, SHBA, Kanada, Mbretëria e Bashkuar, Francë, Spanjë dhe Gjermani, rreth gjysma e të anketuarve thanë se inteligjenca artificiale është tashmë mjaftueshëm e zhvilluar dhe mbështetën një pauzë në zhvillimin e mëtejshëm, me synimin për të ulur rreziqet. Mbështetja ishte 51% në Mbretërinë e Bashkuar dhe 45% në Gjermani.
Lexo edhe: Skocia “frenon” boom-in e AI: pezullohen përkohësisht qendrat gjigante të të dhënave
Në të kundërt, vetëm 30% deri në 40% e të anketuarve në këto vende mbështetën vazhdimin e zhvillimit të Inteligjencës Artificiale për të sjellë përfitime të mëtejshme.
Sondazhi tregon gjithashtu se shumë qytetarë do ta pranonin mundësinë që vendi i tyre të mbetet pas në garën globale të Inteligjencës Artificiale, nëse kjo do të nënkuptonte një zhvillim më të sigurt dhe më të përgjegjshëm. Të anketuarit shfaqën gjithashtu më shumë shqetësim për humbjen e vendeve të punës nga AI sesa pritshmëri për krijimin e vendeve të reja të punës.
Rezultatet publikohen në një kohë kur liderët botërorë po diskutojnë në Nju Jork, në kuadër të Asamblesë së Përgjithshme të OKB-së, mënyrën se si duhet të rregullohet zhvillimi dhe përdorimi i Inteligjencës Artificiale.
Për Evropën, qëndrimet e publikut krijojnë një dilemë mes sigurisë dhe konkurrueshmërisë globale. Bashkimi Evropian ka ndjekur një qasje rregulluese dhe në vitin 2024 miratoi Aktin e Inteligjencës Artificiale, ndërsa kompanitë evropiane mbeten më pak të pranishme në garën për zhvillimin e modeleve më të avancuara. Ndër kompanitë kryesore evropiane përmendet Mistral e Francës.
Sondazhi sugjeron se debati mbi Inteligjencën Artificiale nuk lidhet vetëm me përfitimet ekonomike dhe teknologjike, por gjithnjë e më shumë edhe me sigurinë, vendet e punës dhe mënyrën se si qeveritë duhet të vendosin kufij për zhvillimin e saj.
