Themeluesi i aplikacionit të mesazheve Telegram, Pavel Durov, nën hetim në Francë, e ka cilësuar të gabuar arrestimin e tij, ndërsa ka shtuar se autoritetet franceze duhet t’i drejtoheshin kompanisë së tij për ankesat që kishin.
Durov, duke shkruar në kanalin e tij Telegram në mëngjesin e së premtes mohoi çdo aludim se aplikacioni ishte një “parajsë anarkike”.
Multimiliarderi me origjinë ruse tha se hetimi për aplikacionin ishte befasues pasi autoritetet franceze kishin akses në një “linjë të nxehtë” që ai kishte ndihmuar në ngritjen dhe ata mund të kishin kontaktuar përfaqësuesin e BE-së të Telegram në çdo kohë.
“Nëse një vend është i pakënaqur me një shërbim interneti, praktika e vendosur është të fillojë një veprim ligjor kundër vetë shërbimit,” shkroi ai.
Në vijim Durov tha se “përdorimi i ligjeve nga epoka e para-smartphone-it për të ngarkuar një CEO për krime të kryera nga palë të treta në platformën që ai menaxhon është një qasje e gabuar”.
Telegrami, tha ai, nuk ishte perfekt, por ai mohoi çdo abuzim të lidhur me aplikacionin.
“Por pretendimet në disa media se Telegram është një lloj parajse anarkike janë absolutisht të pavërteta”, shkroi ai duke shtuar “ne heqim miliona postime dhe kanale të dëmshme çdo ditë”.
Lexo edhe: Pas arrestimit, CEO i Telegram, Pavel Durov pretendon se është babai i 100 fëmijëve
Durov, tani një shtetas francez, u arrestua në fund të muajit të kaluar në Francë në mes të një hetimi mbi krimet që lidhen me imazhet e abuzimit seksual të fëmijëve, trafikun e drogës dhe transaksionet mashtruese të lidhura me aplikacionin.
Ai është akuzuar nga drejtësia franceze për gjoja lejimin e veprimtarisë kriminale në aplikacionin e mesazheve, por i shpëtoi qëndrimit në burg me një garanci prej 5 milionë eurosh. Ai u lirua me kusht që të paraqitej në një komisariat dy herë në javë dhe të qëndronte në Francë.
Akuzat kundër Durov përfshijnë bashkëpunim në përhapjen e imazheve seksuale të fëmijëve dhe një sërë shkeljesh të tjera të supozuara në aplikacionin e mesazheve.
Arrestimi i tij i befasishëm ka vënë në qendër të vëmendjes përgjegjësinë penale të Telegram, aplikacionit popullor me rreth 1 miliard përdorues, dhe ka ndezur debatin mbi lirinë e fjalës dhe censurën e qeverisë.
