OpenAI do të lejojë përmbajtje erotike në ChatGPT për përdoruesit e verifikuar

OpenAI, kompania që qëndron pas ChatGPT, planifikon të lejojë një gamë më të gjerë përmbajtjeje, përfshirë edhe erotikën, për përdoruesit e verifikuar si të rritur. Lajmin e bëri të ditur drejtuesi i kompanisë, Sam Altman, i cili tha se ky hap është pjesë e përpjekjeve për ta bërë chatbot-in “më njerëzor”, duke shtuar se ndryshimet do të aplikohen vetëm për ata që i kërkojnë vetë. Kjo lëvizje vjen në një kohë kur konkurentë si xAI i Elon Musk kanë prezantuar chatbotë me përmbajtje eksplicite, duke nxitur një garë të re në tregun e inteligjencës artificiale.

Sipas Altman, ChatGPT ka qenë qëllimisht i kufizuar për shkak të shqetësimeve për shëndetin mendor, por kompania tashmë ka zhvilluar “mjete të reja” që mundësojnë zbutjen e këtyre kufizimeve. Në dhjetor, me zbatimin më të plotë të verifikimit të moshës, OpenAI do të lejojë përmbajtje të reja për të rritur, përfshirë edhe erotikën për përdoruesit e verifikuar. Ky vendim pritet të rrisë të ardhurat për kompaninë, e cila megjithëse po njeh rritje të madhe, ende nuk ka arritur fitim.

Lexo edhe: OpenAI është tani kompania private më e vlefshme në botë pas shitjes së aksioneve

Megjithatë, vendimi ka ngjallur shqetësim për sigurinë e fëmijëve dhe mungesën e rregullave të qarta për aksesin në përmbajtje për të rritur. Juristja amerikane Jenny Kim paralajmëroi se OpenAI duhet të sigurojë që fëmijët të mos kenë mundësi të aksesojnë përmbajtje të tillë, duke e cilësuar lëvizjen si “eksperimentim me njerëzit si kavie”. Në SHBA, autoritetet si Komisioni Federal i Tregtisë (FTC) kanë nisur hetime mbi mënyrën se si chatbotët ndërveprojnë me fëmijët, ndërsa Kalifornia ka refuzuar një ligj që do të ndalonte chatbotët shoqërues për të miturit.

Ndërkohë, analistët e tregut mendojnë se pas këtij vendimi fshihet edhe një strategji ekonomike. Profesori i biznesit në Universitetin Tulane, Rob Lalka, tha se OpenAI po kërkon të mbajë ritmin e rritjes eksponenciale dhe të ruajë dominimin në treg. “Asnjë kompani nuk ka përjetuar adoptim të tillë si ChatGPT. Për të ruajtur këtë vrull, ata duhet të shtyjnë kufijtë e asaj që chatbot-i mund të ofrojë,” theksoi ai.