ChatGPT pritet të ketë së shpejti një “adult mode”, por jo ashtu siç mund ta imagjinojnë shumë njerëz. OpenAI ka konfirmuar se po punon për një version vetëm për të rritur, i cili pritet të lançohet në fillim të vitit 2026, nëse gjithçka shkon sipas planit.
Sipas OpenAI, ky version nuk do të hapet thjesht me një klikim “konfirmo moshën”. Kompania po teston një inteligjencë artificiale që parashikon moshën e përdoruesit, bazuar në sjelljen, mënyrën e të shkruarit dhe temat që diskuton. Qëllimi është të kuptohet automatikisht nëse një përdorues është nën 18 vjeç dhe t’i aplikohen filtrat e duhur të përmbajtjes. Derisa ky sistem të jetë i sigurt dhe funksional, përmbajtja për të rritur në ChatGPT do të mbetet e ndaluar.
Ndryshe nga sa mendohet, “adult mode” mund të mos fokusohet te lakuriqësia apo përmbajtja eksplicite. Sipas drejtuesve të OpenAI, ideja kryesore është të lejojë biseda më të hapura për tema që sot janë të kufizuara, si seksualiteti, marrëdhëniet apo shëndeti mendor, të cilat nuk janë gjithmonë të përshtatshme për fëmijë, por janë normale për të rriturit.
Lexo edhe: OpenAI do të lejojë përmbajtje erotike në ChatGPT për përdoruesit e verifikuar
Megjithatë, parashikimi i moshës është një sfidë e madhe. Një gabim mund të ketë pasoja ligjore ose të dëmtojë besimin e përdoruesve. Për këtë arsye, OpenAI po e teston këtë teknologji me shumë kujdes, ndërkohë që edhe qeveritë në mbarë botën po vendosin rregulla më të forta për verifikimin e moshës online.
Në fund, “adult mode” shihet edhe si një mënyrë për t’u ofruar përdoruesve një përvojë më të personalizuar me ChatGPT dhe ndoshta për të nxitur abonimet premium. Nëse funksionon, ky mund të jetë një hap i ri për chatbot-ët më “të pjekur” në të ardhmen.
