Ferrari po hyn fuqishëm në botën e Inteligjencës Artificiale. Skuadra legjendare e Formula 1, Scuderia Ferrari HP, ka bashkëpunuar me IBM për të përdorur AI në mënyrë që tifozët të ndihen më afër ekipit se kurrë më parë. Qëllimi? Të kthejnë shikuesit e zakonshëm të garave në fansa të apasionuar që ndjekin çdo detaj të Ferrarit.
Sipas raportimeve, sistemi i ri me AI do të analizojë sjelljen dhe interesat e tifozëve për t’u ofruar eksperienca të personalizuara. Kjo do të thotë se çdo person mund të marrë përmbajtje të ndryshme: komente gare sipas stilit që preferon, video “behind the scenes”, statistika të personalizuara apo lajme të zgjedhura sipas interesit të tij.
Ferrari beson se Formula 1 nuk është më vetëm një sport televiziv, por një eksperiencë digjitale 24 orë në ditë. Përmes AI, ekipi mund të kuptojë se cilat momente të garës emocionojnë më shumë tifozët, cilët pilotë tërheqin më shumë vëmendje dhe çfarë lloj përmbajtjeje i mban njerëzit aktivë në aplikacione dhe rrjete sociale.
Lexo edhe: Festivali i Filmit në Kanë shuan zërat: Nuk do të debutojë një film të gjeneruar nga IA këtë javë
IBM do të përdorë teknologjinë e saj për të analizuar miliona të dhëna nga aplikacionet, rrjetet sociale dhe platformat online të Ferrarit. Kjo i lejon ekipit të krijojë profile më të sakta të tifozëve dhe të parashikojë çfarë do t’i mbajë ata të lidhur me ekipin edhe në të ardhmen.
Ekspertët mendojnë se ky bashkëpunim mund të ndryshojë mënyrën sesi klubet sportive komunikojnë me fansat. Nëse Ferrari arrin të rrisë shitjet, angazhimin online dhe numrin e tifozëve falë AI, shumë skuadra të tjera sportive mund të ndjekin të njëjtën rrugë shumë shpejt.
Në fund, kjo tregon se Inteligjenca Artificiale nuk po përdoret vetëm në punë apo teknologji, por edhe në sport dhe argëtim. Ferrari po përpiqet të krijojë një lidhje më personale me çdo tifoz, duke e bërë çdo ndjekës të ndihet si pjesë e skuadrës së famshme italiane.
