Ajo duket perfekte, tepër perfekte. Fytyra e saj është pa pore, koka e saj lëviz lehtë dhe zëri i saj nuk devijon as një centimetër nga nota e dëshiruar. Ajo është Anna Indiana, muzikantja e parë, e gjithë ekzistenca e së cilës – nga imazhi dhe këndimi deri te arranzhimi i akordit, çelësi, tempi dhe teksti i muzikës – pretendohet se është krijuar nga inteligjenca artificiale, pa përfshirjen njerëzore.
Në këngën e saj debutuese, “Betrayed by this Town”, Indiana këndon se është zemërthyer, endet vetëm në rrugë dhe dëshiron të shkatërrojë një qytet plot me “shpresa të copëtuara dhe britma të heshtura”. Në video, ajo është e ulur përballë një mikrofoni dhe të kujton këngëtarët amatorë në Youtube.
“Përshendetje Botë! Unë jam Anna Indiana dhe jam një këngëtare dhe kantautore e AI. Kjo është kënga ime e parë, “Betrayed by this Town”. Gjithçka nga çelësi, ritmi, akordet, notat e melodisë, ritmi, teksti, imazhi dhe këndimi im, gjenerohet automatikisht duke përdorur AI. Unë shpresoj se t’ju pëlqejë.”
Ky është teksti me të cilin fillon videoja e saj e parë, dhe me gjithë pritshmëritë, duhet thënë se kjo këngë është veçanërisht mediokre. Ditët e fundit, Anna ka publikuar këngën e saj të dytë “The First Step” e cila nuk është se i shton ndonjë vlerë më shumë repertorit të saj.
Anna numëron mbi 600 ndjekës në kanalin e saj në Youtube, megjithatë, ka mbi 50 000 shikime në të dyja videot e saj të para, me siguri nga kuriozë si ne. Në të kundërt, komentet nën videot e saj janë të ashpra, duke kritikuar mungesën e emocionit, gjë që pritej nga një këngëtare që në fakt nuk ekziston. Anna ka gjithashtu profilin e saj në Instagram ku ka filluar të fitojë ndjekësit e parë.
