Jo të gjithë adoleshentët e përdorin teknologjinë për tik tok. Ky grup gjimnazistësh tek “Ismail Qemali” në Tiranë përmes saj synon t’i shërbejë shoqërisë.
“Unë dhe ti ndryshe” është një aplikacion që përkthen gjuhën e shenjave në fjalë ose figura. Këta tre 17 vjeçarë e kanë krijuar për t’ju ardhur në ndihmë fëmijëve që nuk dëgjojnë.
“Mund të shohë përkthimin e shkronjave në fjalë, jo vetëm mësuesja, por të gjithë ata që komunikojnë me njerëz me aftësi të kufizuar”
Për ndërtimin e kësaj ure komunikimi frymëzim patën shokët e shkollës, por synimin e kanë ta nxjerrin përtej mureve të saj
“Synon ndryshimin në arsim përmes inteligjencës artificiale, duke bërë të lehtë për mësuesit shpjegimin e mësimit tek nxënësit me dëgjim të dobët. “
“Këtë duam ta implementojmë në shkolla të cilat synojnë të ndihmojnë nxënës me aftësi të kufizuar, është posaçërisht për to, por mund të krijosh dhe një program ku çdo person mund të shkarkojë dhe ta përdorë vetë.”
Ndërsa binjaket Ersa dhe Eda të ftojnë të zbulosh Shqipërinë. Një vendas apo I huaj mund të planifikojë një udhëtim në një prej qyteteve të vendit tonë duke klikuar në “Eja me mua”. Pyetjeve të turistëve që kanë marrë gjatë verës dy 16 vjeçaret vendosën ti përgjigjen me këtë aplikacion.
“Turistët mund të kenë ndaluar, të kenë komunikuar jo vetëm për të gjetur rrugën drejt një destinacioni, por si mund të kalojnë kohën në një qytet.”
” Ne kemi krijuar Chatbotin e parë shqiptar dhe synojmë ta hedhim online chatbotin që kthen përgjigje në shqip. Mund ta pyesim cilët janë atraksionet turistike në Korçë, ai do të na i rendisi. Mund ti shkruajmë chatbot për një plan të detajuar për të vizituar një qytet dhe ai do të na kthejë përgjigje me sugjerimet e tij.”
Për të apasionuarit pas natyrës dhe bimëve kanë menduar Donaldi, Juliani dhe Floriani. Krijimi i një kopshti pranë shtëpisë bëhet më i lehtë përmes aplikacionit “Bloom bot”.
“Mund të fotografojmë një bimë. Databasa ynë krijon formulat e veta që klasifikojnë bimën sipas problemit që shfaq. Kjo mund të ndihmojë të mësosh nëse një bimë ka mungesë nutrientësh, pse është vyshkur , a është dëmtuar nga faktorë të jashtëm, pa skanim fizik apo pa bërë teste kimike”
Për projektet inovative të rinjtë kanë përdorur inteligjencën artificiale. Laboratorët e saj aktualisht janë funksional në 9 shkolla të vendit me synimin për t’u shtrirë dhe në 15 të tjera.
