Ky është paralajmërimi që Bashkimi Europian sapo u bëri gjigantëve të teknologjisë 

Presidentja e Komisionit Europian, Ursula von der Leyen, ka paralajmëruar kompanitë e mëdha të teknologjisë, duke përfshirë X, Meta, Apple dhe TikTok, se Bashkimi Europian do të zbatojë me rreptësi rregulloret e saj digjitale, pavarësisht se kush i drejton kompanitë ose ku janë të bazuara ato.

“Rregulloret e miratuara nga ligjvënësit tanë duhet të zbatohen. Kjo është arsyeja pse ne kemi nisur procedurat kundër TikTok, X, Apple, Meta – për të përmendur vetëm disa. Ne do t’i zbatojmë rregulloret në mënyrë të drejtë, proporcionale dhe pa paragjykime. Ne nuk na intereson se nga është kompania ose kush e drejton atë. Ne kujdesemi për mbrojtjen e njerëzve”, tha von der Leyen në një përgjigje me shkrim për rregulloren e BE-së.

Deklaratat e saj nënvizojnë vendosmërinë e BE-së për të zbatuar një paketë gjithëpërfshirëse rregulloresh digjitale, të cilat janë përballur me kritika të ashpra nga anëtarë të lartë të administratës së presidentit amerikan Donald Trump.

Lexo edhe: Zuckerberg në gjykatë: Unë i bëra WhatsApp dhe Instagram më të mirë

Zëvendëspresidenti i SHBA-së, JD Vance ka udhëhequr kritikat ndaj ligjeve europiane si Akti i Shërbimeve Digjitale (DSA), i cili rregullon përmbajtjen dhe Aktin e Inteligjencës Artificiale (Akti AI), duke argumentuar se ato censurojnë fjalën e lirë dhe mbytin inovacionin në Evropë.

Dy muaj përpara zgjedhjeve presidenciale në SHBA, Vance e lidhi pjesëmarrjen e Uashingtonit në NATO me rregulloret digjitale evropiane, duke sugjeruar se Shtetet e Bashkuara mund të ndalojnë mbështetjen për Aleancën nëse BE-ja zbaton ligjet mbi platformat.

Një presion i tillë ka ngritur shqetësimin se BE-ja mund të vonojë zbatimin e ligjeve të saj për të shmangur “zemërimin” e administratës Trump, veçanërisht në kontekstin e negociatave të tensionuara mbi tarifat tregtare të SHBA kundër Europës.

Komisioni Europian aktualisht po shqyrton gjobat e mundshme kundër rrjetit X pas përfundimit të një hetimi mbi platformën në janar.

New York Times raportoi në fillim të prillit se Brukseli do të vendoste një gjobë deri në 1 miliard dollarë, megjithëse një zëdhënës i Komisionit e mohoi raportin.