Gjithçka që duhet të dini rreth iOS 26 të Apple

Apple prezantoi përditësimet më të fundit të teknologjisë së saj gjatë konferencës vjetore për zhvilluesit (WWDC 2025), duke treguar disa nga veçoritë që priten me iOS 26 — versioni i ribranduar nga iOS 19. Megjithëse do të duhen edhe disa muaj deri në lëshimin zyrtar, disa nga ndryshimet kryesore janë tashmë të njohura.

Dizajni i ri: “Liquid Glass”

Ndryshimi më i dukshëm vizual është stili i ri i dizajnit “Liquid Glass”, një estetikë e frymëzuar nga xhami që do të aplikohet në të gjitha pajisjet Apple. Ky përditësim pritet të sjellë një ndjesi më elegante dhe të lëmuar në ndërfaqe.

Mbrojtje ndaj spam-it në mesazhe

Apple po shton funksione të reja për të bllokuar mesazhet e padëshiruara. Tani, dërguesit e panjohur do të shfaqen në një seksion të veçantë ku përdoruesit mund të zgjedhin nëse do t’i pranojnë, të kërkojnë më shumë informacion, apo t’i fshijnë. Derisa të pranohet dërguesi, mesazhet nuk do të japin njoftime.

Siri dhe Inteligjenca Artificiale

Ndryshe nga vitet e tjera, këtë herë Apple nuk i kushtoi shumë vëmendje Siri-t apo përmirësimeve të reja me inteligjencë artificiale. Sipas ekspertëve të teknologjisë, kompania po ecën me kujdes në këtë fushë për të mos zhgënjyer përdoruesit e saj besnikë.

“Workout Buddy” për Apple Watch

Për përdoruesit e Apple Watch, vjen një veçori e re e quajtur “Workout Buddy”. Kjo përdor AI për të analizuar të dhënat e aktivitetit fizik — si ritmi i zemrës dhe distanca — dhe jep këshilla të personalizuara për përmirësim. Funksioni mbështet disa sporte dhe e bën më të lehtë ndjekjen e progresit.

Përkthim i drejtpërdrejtë: “Live Translation”

Një tjetër risi e madhe është funksioni “Live Translation”, që mundëson përkthim të menjëhershëm të bisedave në telefon, FaceTime apo mesazhe. Ndërkohë që flisni, zëri juaj përkthehet dhe i lexohet personit tjetër në gjuhën e tij, dhe anasjelltas. Në FaceTime, përkthimi do të shfaqet si titra në kohë reale.

Së shpejti edhe sondazhe në mesazhe

Apple ka paralajmëruar gjithashtu se në të ardhmen do të mund të krijohen sondazhe brenda mesazheve — një mënyrë praktike për të marrë mendime në grup.

iOS 26 pritet të lançohet më vonë gjatë vitit, krahas modelit të ri të iPhone. Deri atëherë, përdoruesit mund të presin një përvojë më të sofistikuar vizualisht, më shumë kontroll mbi privatësinë dhe hapa të kujdesshëm drejt integrimit të AI-së në jetën e përditshme.