Presidenti amerikan Donald Trump ka nënshkruar një urdhër ekzekutiv që i hap rrugë një marrëveshjeje për vendosjen e TikTok nën pronësi amerikane, duke shmangur kështu ndalimin e platformës në Shtetet e Bashkuara. Vendimi vjen pas muajsh debatesh mbi sigurinë kombëtare dhe përdorimin e të dhënave të qytetarëve amerikanë.
Sipas planit, një konsorcium investitorësh amerikanë, ku përfshihen Oracle dhe Silver Lake Partners, do të blejnë shumicën e aksioneve të TikTok, duke e shndërruar aplikacionin në një kompani të re me rreth 80% pronësi amerikane. ByteDance, kompania kineze që zotëron aktualisht platformën, do të mbajë më pak se 20% të aksioneve, ndërsa përfaqësuesi i saj në bord nuk do të ketë akses në çështje të ndjeshme të sigurisë.
“Qëllimi ishte i qartë: të ruanim TikTok, por edhe të mbronim privatësinë e amerikanëve sipas ligjit,” tha nënpresidenti JD Vance, duke shtuar se pavarësisht rezistencës kineze, marrëveshja është në rrugë të mirë. Nga ana tjetër, Trump theksoi se ky vendim reflekton edhe presionin e madh nga të rinjtë, të cilët “me të vërtetë e donin këtë zgjidhje”.
Megjithatë, marrëveshja ngre edhe pikëpyetje të forta për ndikimin politik. Disa nga investitorët e rinj, si Larry Ellison(Oracle) dhe Rupert Murdoch, kanë lidhje të forta biznesore e politike me Trump, duke ngritur dyshime mbi mënyrën se si mund të filtrohet përmbajtja në platformë. Civil liberties director i Electronic Frontier Foundation, David Greene, paralajmëroi se politika editoriale e TikTok-ut mund të ndikohet nga interesat e pronarëve të rinj.
Çështja më e ndjeshme mbetet algoritmi i rekomandimeve, motori që përcakton çfarë video shikon secili përdorues. Deri tani, Kina këmbëngulte që ai të mbetej nën kontroll të saj, por ligji amerikan kërkon që çdo divestim të shkëpusë përfundimisht lidhjet me ByteDance. Për këtë arsye, kontrolli i algoritmit pritet t’i kalojë investitorëve amerikanë.
TikTok është një nga rrjetet sociale më me ndikim në SHBA, veçanërisht tek të rinjtë. Sipas një studimi të Pew Research Center, 43% e amerikanëve nën moshën 30 vjeç marrin rregullisht lajmet përmes këtij aplikacioni – një përqindje më e lartë se në çdo platformë tjetër, përfshirë YouTube, Facebook dhe Instagram.
Vendimi i Trump-it i jep palëve 120 ditë kohë shtesë për të finalizuar marrëveshjen. Nëse ajo miratohet edhe nga autoritetet kineze, TikTok do të mbetet i disponueshëm për përdoruesit amerikanë, por nën një kontroll të ri – më shumë politik dhe ekonomik sesa teknologjik.
