Presidenti amerikan Donald Trump ka firmosur një urdhër ekzekutiv që synon përdorimin e inteligjencës artificiale (AI) për të përshpejtuar përparimin në luftën kundër kancerit pediatrik. Vendimi parashikon 50 milionë dollarë fonde shtesë për Childhood Cancer Data Initiative, një program i nisur gjatë mandatit të tij të parë.
Sipas Shtëpisë së Bardhë, fondet do të shfrytëzohen për mbledhjen dhe analizimin e sasive të mëdha të të dhënave mjekësore, duke përdorur AI për diagnoza më të sakta, prova klinike më të shpejta dhe strategji më efikase parandalimi. “Do ta lidhim inteligjencën artificiale me të gjitha mjetet që kemi në dorë dhe do të gjejmë përgjigje,” tha Trump në Zyrën Ovale, duke iu drejtuar edhe fëmijëve të mbijetuar nga kanceri të pranishëm aty: “Ju shumë shpejt do të jeni më mirë”.
Lexo edhe: Shefi i ChatGPT parashikon se kur Inteligjenca Artificiale mund të kurojë kancerin
Kanceri i fëmijërisë, edhe pse i rrallë, mbetet shkaku kryesor i vdekjeve të lidhura me sëmundjet tek fëmijët në SHBA pas periudhës së foshnjërisë. Shoqata Amerikane e Kancerit vlerëson se rreth 9,550 fëmijë do të diagnostikohen me kancer gjatë vitit 2025. Ndërkohë që shkalla e mbijetesës është rritur ndjeshëm që nga vitet ’70, rastet e reja vazhdojnë të jenë në rritje. Në nivel global, sipas OBSH-së, kanceri prek rreth 400 mijë fëmijë dhe adoleshentë çdo vit.
Me këtë urdhër, angazhimi i National Institutes of Health për programin dyfishohet në 100 milionë dollarë. Megjithatë, nisma vjen në një kohë kur buxhetet federale për shkencën janë tkurrur ndjeshëm, duke përfshirë edhe reduktimin e granteve për rrjete kërkimore afatgjata mbi kancerin pediatrik. Kritikët e shohin këtë si një kontradiktë mes mbështetjes së re financiare dhe shkurtimit të përgjithshëm të fondeve për shkencën.
