Një defekt teknik në sistemin e Amazon Web Services (AWS) mjaftoi për të shkaktuar kaos global online këtë javë. Për disa orë, platformat e bankingut online, rrjetet sociale, faqet qeveritare dhe aplikacionet e shpërndarjes së ushqimit u bllokuan, duke prekur më shumë se 8 milionë përdorues në mbarë botën.
Në një shpjegim të detajuar të publikuar në faqen e saj zyrtare, Amazon bëri me dije se rrënja e problemit qëndronte te një “defekt latent” në sistemin e automatizuar të menaxhimit të DNS (Domain Name System). Ky bug shkaktoi një varg ndërprerjesh që ndaluan klientët e AWS – përfshirë kompani si Signal, Roblox, Snapchat dhe faqen tatimore të Mbretërisë së Bashkuar – nga lidhja me shërbimin DynamoDB, që ruan të dhënat e përdoruesve.
Lexo edhe: Amazon dhe Canva jashtë funksionit për shkak të problemeve që lidhen me IA-në
DNS funksionon si “libri i telefonave” i internetit, duke përkthyer emrat e faqeve në adresa IP që kompjuterët mund t’i kuptojnë. Por në këtë rast, sistemi automatik i AWS fshiu aksidentalisht të dhënat DNS për një nga pikat kryesore të rajonit të Virxhinias së Veriut, duke shkëputur lidhjen me disa prej shërbimeve më të rëndësishme. Defekti nuk u riparua automatikisht dhe kërkoi ndërhyrje manuale nga inxhinierët e kompanisë.
Edhe pse Amazon arriti ta rikthente funksionimin normal brenda disa orësh, pasojat totale u ndjenë për rreth 14.5 orë. Sipas Downdetector, mbi 2,000 faqe dhe aplikacione përsuan ndërprerje. Ekspertët e teknologjisë paralajmëruan se incidenti tregon rrezikun e mbështetjes së tepërt të Evropës dhe botës në një shërbim të vetëm cloud, duke theksuar nevojën për zhvillimin e infrastrukturave alternative të pavarura./Euronews
