Platforma estoneze e transportit Bolt ka njoftuar partneritetin me kompaninë kineze të automjeteve autonome Pony.ai, për të sjellë makinat pa shofer në Europë.
Sipas njoftimit, teknologjia autonome e Pony.ai e nivelit 4 — që lejon funksionimin e makinës pa ndërhyrje njerëzore në kushte të caktuara — do të integrohet në rrjetin e Bolt. Fillimisht, fokusi do të jetë testimi real, siguria dhe përmirësimi i përvojës së përdoruesit, para se të nisë shërbimi i plotë robotaksi.
Bolt nuk ka dhënë ende një datë të saktë se kur makinat do të dalin në rrugë, por ka konfirmuar se testimet e para do të zhvillohen në qytete të vendeve anëtare të BE-së dhe në shtete të tjera evropiane.
Pony.ai është një nga kompanitë më të avancuara në botë për autonominë e lartë. Ajo operon shërbime plotësisht pa shofer në Pekin, Guangzhou, Shanghai dhe Shenzhen dhe ka një flotë prej 720 robotaksish dhe rreth 200 kamionësh autonomë. CEO i kompanisë e konsideroi Europën një treg shumë premtues dhe në rritje për këtë lloj teknologjie.
Lexo edhe: Një rikthim pas një dekade të plotë – Audi RS6 sërish si sedan me mbi 700 kuaj/fuqi
Ky partneritet vjen në një kohë kur kompanitë kineze po shtyjnë gjithnjë e më shumë drejt tregut evropian, duke qenë se përballen me kufizime të forta në SHBA. Vetëm muajin e kaluar, Uber dhe start-up-i Momenta njoftuan testime robotaksi në Gjermani, ndërsa Lyft po bashkëpunon me Baidu për të sjellë robotaksit në Europë vitin e ardhshëm.
Ndërkohë, edhe kompani perëndimore si Waymo, Cruise dhe start-up-e të tjera evropiane po garojnë për të komercializuar makinën autonome, e cila sipas mbështetësve mund të ulë aksidentet dhe të transformojë mënyrën si lëvizin njerëzit në qytete.
