Në një përpjekje të guximshme për t’iu përshtatur rritjes së temperaturave globale, Katari ka nisur një projekt pilot për testimin e të ashtuquajturave “rrugë blu” në qendër të Dohas. I udhëhequr nga Autoriteti i Punëve Publike (Ashghal), ky iniciativë konsiston në aplikimin e një shtrese speciale reflektuese mbi sipërfaqen e rrugës, e cila synon të ulë ndjeshëm nxehtësinë pranë nivelit të tokës.
Prova u realizua në rrugën Abdullah Bin Jassim, ku asfalti tradicional i zi u zëvendësua me një material me nuancë blu, i dizajnuar për të reflektuar më shumë rrezet e diellit dhe për të thithur më pak nxehtësi.
Rezultatet e para tregojnë se temperaturat e sipërfaqes së rrugës mund të ulen deri në 20°C krahasuar me asfaltin konvencional. Kjo ulje jo vetëm përfaqëson një arritje teknologjike, por mund të shndërrohet edhe në një element kyç në luftën kundër fenomenit të “ishullit të nxehtësisë urbane”, i cili prek shumë qytete të dendura, ku betoni dhe asfalti bllokojnë nxehtësinë dhe rrisin temperaturat lokale.
Përveç efektit freskues, sipërfaqja reflektuese mund të zgjasë edhe jetëgjatësinë e rrugëve, duke i ndihmuar ato të përballojnë më mirë kushtet ekstreme të klimës. “Rrugët blu” të Katarit janë ndër zbatimet e para në shkallë të gjerë të këtij lloji në rajon, duke vendosur një precedent për qytetet e tjera në klimë të nxehtë e të thatë që kërkojnë zgjidhje praktike ndaj ndryshimeve klimatike.
Projekti është në linjë me objektivat e qëndrueshmërisë së vendit dhe pasqyron qasjen proaktive të Katarit për t’u bërë më rezistent ndaj klimës përmes planifikimit urban inovativ.
