Meta po vendos kufizime shumë më të forta për mënyrën se si adoleshentët përdorin Instagram dhe Facebook në SHBA. Pas një marrëveshjeje gjyqësore me 48 shtete amerikane, kompania ka rënë dakord që llogaritë e përdoruesve nën 18 vjeç të kenë si parazgjedhje një limit prej dy orësh përdorimi në ditë, ndërsa nga mesnata deri në orën 06:00 aksesi do të bllokohet. Marrëveshja përfshin gjithashtu fshehjen e numrit të “like”-ve dhe masa të tjera për mbrojtjen e të miturve.
Dy orë Instagram në ditë dhe “fikje” gjatë natës
Një tjetër ndryshim i rëndësishëm lidhet me verifikimin e moshës. Meta ka rënë dakord të përmirësojë teknologjinë për identifikimin e përdoruesve të mitur, duke kombinuar sistemet e veta me teknologji të palëve të treta dhe auditime të pavarura. Nëse një përdorues identifikohet si nën 13 vjeç dhe llogaria e tij hiqet, kompania do të kontrollojë edhe moshën e personave me të cilët ai është i lidhur në platformë.
Lexo edhe: Meta pranon se ka dëmtuar fëmijët, ja kujt po i paguan 18 miliardë dollarë dëmshpërblim
Limiti ditor prej dy orësh do të aktivizohet automatikisht dhe adoleshentët nuk do të mund ta çaktivizojnë pa lejen e prindit. Edhe kufizimi gjatë natës do të jetë aktiv si parazgjedhje. Meta do të ofrojë masa të tjera, ndërsa disa opsione — si çaktivizimi i autoplay për videot apo shfaqja e postimeve në rend kronologjik në vend të rekomandimeve algoritmike — do të mbeten opsionale.
A mjaftojnë këto masa?
Ekspertët e sigurisë online e konsiderojnë marrëveshjen një hap të rëndësishëm, por paralajmërojnë se dy orë përdorim nuk e zgjidhin automatikisht problemin e varësisë nga rrjetet sociale. Një prej shqetësimeve kryesore mbeten algoritmet e rekomandimeve, të cilat mund t’i shtyjnë të rinjtë drejt konsumimit të vazhdueshëm të përmbajtjes. Kritikët kërkojnë që disa prej këtyre sistemeve të kufizohen automatikisht për llogaritë e të miturve.
Marrëveshja parashikon që Meta të paguajë rreth 18 miliardë dollarë gjatë një periudhe dhjetëvjeçare, ndërsa shumica e masave të reja do të qëndrojnë në fuqi për 10 vjet. Për momentin, rregullat do të zbatohen vetëm në Shtetet e Bashkuara. Ndryshimet megjithatë mund të shënojnë një kthesë të rëndësishme në debatin global mbi mënyrën se si Instagram, Facebook dhe platformat e tjera duhet të mbrojnë fëmijët dhe adoleshentët nga përdorimi i tepërt dhe përmbajtjet potencialisht të dëmshme.
