Të jetosh me nxehtësi ekstreme mund t’ju bëjë të plakeni më shpejt

Një studim i ri i publikuar në revistën shkencore Science Advances tregon se ekspozimi kronik ndaj temperaturave ekstreme mund të përshpejtojë plakjen biologjike.

Sipas studimit, të moshuarit që jetojnë në zona më të nxehta të SHBA-së treguan shenja të plakjes më të shpejtë në nivel molekular, krahasuar me ata që jetojnë në zona më të freskëta. Studiuesit matën moshën biologjike të individëve bazuar në funksionimin e trupit të tyre në nivel qelizor, duke zbuluar se ekspozimi i zgjatur ndaj të nxehtit mund ta rrisë atë deri në 2.48 vite, një efekt i krahasueshëm me ndikimin e pirjes së duhanit.

Temperaturat ekstreme janë tashmë një nga rreziqet më të mëdha të motit në SHBA, ndërsa ndryshimet klimatike po i bëjnë valët e të nxehtit më të shpeshta dhe më intensive. Ky studim tregon se përveç rreziqeve të menjëhershme, si goditjet nga të nxehtit, ekzistojnë edhe efekte të fshehta afatgjata që mund të çojnë në sëmundje dhe paaftësi.

Analiza u bazua në mostrat e gjakut të 3,686 të rriturve mbi 56 vjeç, të krahasuara me të dhënat e indeksit të të nxehtit midis viteve 2010 dhe 2016. Rezultatet treguan se personat që jetojnë në zona ku indeksi i të nxehtit është mbi 32°C për gjysmën e vitit, përjetuan deri në 14 muaj plakje biologjike shtesë, krahasuar me ata që jetojnë në zona më të freskëta.

Lexo edhe: Pijet energjike përshpejtojnë rënien e flokëve tek meshkujt, ja si ta shmangim

Megjithatë, studiuesit theksojnë se nuk janë marrë parasysh faktorë si aksesimi në ajër të kondicionuar apo mënyrat e tjera për t’u freskuar, të cilat mund të ndikojnë në ekspozimin individual ndaj të nxehtit. Kjo nënkupton se jo të gjithë personat në të njëjtën zonë preken njësoj.

Për të mbrojtur shëndetin në një botë që po nxehet, nevojiten masa si mbjellja e më shumë pemëve, bojatisja e çative me ngjyra të çelura dhe krijimi i hapësirave publike me ajër të kondicionuar. Vetëdijësimi mbi këto rreziqe është hapi i parë drejt gjetjes së zgjidhjeve efektive.