Paris Hilton është përfshirë publikisht në luftën kundër pornografisë “deepfake” të krijuar me inteligjencë artificiale, duke kërkuar mbrojtje ligjore për viktimat. Ajo u shfaq përkrah kongresistes amerikane Alexandria Ocasio-Cortez për të mbështetur ligje që mbrojnë gratë dhe vajzat nga përdorimi i imazheve të tyre pa pëlqim.
Hilton e lidhi këtë problem me përvojën e saj personale në fillim të viteve 2000, kur një video intime u publikua pa dëshirën e saj. Ajo tha se ajo që u quajt atëherë “skandal”, në fakt ishte abuzim, dhe se në atë kohë nuk ekzistonin ligje që ta mbronin. Sipas saj, deepfake-t seksualë të sotëm janë një formë e re dhune digjitale që po prek mijëra gra dhe vajza në mbarë botën.
Së fundmi, autoritetet në shumë vende kanë reaguar ndaj përhapjes së imazheve seksuale false të krijuara me AI, përfshirë raste ku përmendet edhe chatbot-i Grok i Elon Musk. Studiuesit kanë treguar se, pavarësisht masave mbrojtëse, këto sisteme mund të krijojnë dhe shpërndajnë përmbajtje abuzuese pa pëlqimin e personave realë.
Lexo edhe: Alarm në rrjet: Deepfake me fytyrën e Ilir Paços përdoret për mashtrime financiare, denoncon Erion Demiri
Paris Hilton tha se edhe ajo vetë ka qenë objekt i mbi 100,000 deepfake-ve seksuale, asnjë prej të cilave nuk është reale apo e pranuar nga ajo. Për këtë arsye, ajo po mbështet ligjin DEFIANCE Act, i cili do t’u japë viktimave të drejtën të ndjekin ligjërisht personat që krijojnë dhe shpërndajnë këto materiale. Sipas saj, kjo nuk është thjesht çështje teknologjie, por çështje dinjiteti, sigurie dhe drejtësie për viktimat.
Në SHBA dhe Evropë po shtohen përpjekjet ligjore për të frenuar deepfake-t abuzuese, ndërsa vende si Franca, Danimarka dhe Mbretëria e Bashkuar tashmë kanë vendosur dënime të forta për shpërndarjen e përmbajtjeve seksuale pa pëlqim.
