Shumë njerëz i presin ose i injorojnë etiketat e rrobave pa e ditur se ato janë “manuali” më i rëndësishëm për kujdesin ndaj tyre. Shenjat e vogla që shihni në etiketa tregojnë saktësisht si duhet të lahen, thahen, hekuroset apo pastrohen rrobat, në mënyrë që të mos dëmtohen. Neptun ka shpjeguar kuptimin e tyre:
Për shembull, simboli i legenit me ujë tregon mënyrën e larjes. Nëse brenda ka një numër si 30° apo 40°, kjo është temperatura maksimale e ujit. Një dorë mbi legen do të thotë që rroba duhet larë me dorë, ndërsa një X mbi simbol tregon se nuk duhet larë fare me ujë.
Edhe simboli i trekëndëshit është shumë i rëndësishëm. Ai lidhet me zbardhuesit. Nëse trekëndëshi është bosh, mund të përdorni zbardhues, por nëse ka një X, duhet ta shmangni sepse mund të dëmtojë ngjyrën dhe materialin e rrobës.
Për tharjen përdoret simboli i katrorit. Një rreth brenda katrorit tregon se rroba mund të futet në tharëse. Pikat brenda simbolit tregojnë temperaturën: një pikë për temperaturë të ulët dhe dy pika për temperaturë normale. Nëse simboli është i kryqëzuar, tharësja nuk rekomandohet.
Lexo edhe: Mashtrimi i ri online: Ja çfarë është Quishing dhe si të mbrohemi
Hekurosja paraqitet me simbolin e hekurit. Pikat mbi të tregojnë temperaturën që duhet përdorur. Një pikë do të thotë temperaturë e ulët për materiale delikate si mëndafshi, ndërsa tre pika tregojnë temperaturë të lartë për pambukun apo lino.
Kuptimi i këtyre simboleve mund t’ju ndihmojë të kurseni para dhe të zgjasni jetën e rrobave tuaja të preferuara. Me pak më shumë kujdes dhe vëmendje ndaj etiketave, rrobat do të duken më të reja për më gjatë dhe garderoba juaj do të qëndrojë gjithmonë në gjendje perfekte.
