Një epokë e re nis për Apple. John Ternus, 51 vjeç, merr drejtimin e kompanisë pas 15 viteve të Tim Cook, duke trashëguar një prej kompanive teknologjike më të fuqishme në botë, por edhe një sfidë të madhe: ta bëjë Apple më konkurruese në garën globale të inteligjencës artificiale.
Ternus iu bashkua Apple në vitin 2001 dhe u ngjit gradualisht deri në postin e zëvendëspresidentit të lartë për inxhinierinë hardware. Ai ka drejtuar ekipet që qëndrojnë pas pothuajse të gjithë produkteve kryesore të kompanisë, përfshirë iPhone, burimin më të rëndësishëm të të ardhurave të Apple. Me diplomë në inxhinieri mekanike nga University of Pennsylvania, Ternus njihet brenda kompanisë për fokusin te pajisjet më të qëndrueshme, të besueshme dhe me ndikim më të ulët mjedisor.
Por sfida më e madhe nuk do të jetë vetëm hardware-i. Ndërsa rivalët kanë avancuar me shpejtësi në AI, analistët besojnë se Ternus duhet të përcaktojë atë që mund të quhet “kapitulli i inteligjencës artificiale” i Apple. Zgjedhja e një drejtuesi të hardware-it në vend të një figure të software-it mund të duket e pazakontë, por disa ekspertë argumentojnë se konsumatorët vazhdojnë të zgjedhin fillimisht pajisjen dhe më pas teknologjinë që funksionon brenda saj.
Lexo edhe: Tim Cook do të largohet si CEO i Apple? Ja kush mund të marrë përsipër drejtimin
Një tjetër provë e madhe do të jetë varësia e Apple nga Kina. Tim Cook ndërtoi gjatë dekadave një nga zinxhirët më kompleksë të furnizimit në botë dhe arriti të ruante marrëdhënie si me Pekinin, ashtu edhe me Uashingtonin. Apple ka zhvendosur gradualisht një pjesë të prodhimit drejt Indisë dhe Vietnamit, por Kina vazhdon të ketë një rol vendimtar si në prodhim, ashtu edhe si treg për kompaninë.
Në të njëjtën kohë, administrata amerikane po ushtron presion që Apple të prodhojë më shumë pajisje në SHBA. Pikërisht diplomacia ekonomike dhe politike është një territor shumë më i ri për Ternus. Megjithatë, Tim Cook nuk largohet plotësisht nga Apple: ai kalon në rolin e kryetarit ekzekutiv të bordit dhe pritet të vazhdojë angazhimin me politikëbërësit ndërkombëtarë.
Testi i parë publik për John Ternus vjen shumë shpejt. Më 9 shtator, Apple zhvillon eventin e saj vjetor të iPhone, ku pritet të prezantojë edhe iPhone-in e parë të palosshëm. Për Ternus, pyetja tashmë nuk është vetëm se çfarë pajisjeje të re do të ndërtojë Apple, por nëse nën drejtimin e tij kompania do të arrijë të rikthehet në pararojë të revolucionit të inteligjencës artificiale.
